Idrissa Gueye u përjashtua me karton të kuq në ndeshjen Manhcester United – Everton pasi e goditi me shuplakë bashkëlojtarin e tij, Michael Keane.

Të dy u irrituan pasi Bruno Fernandes goditi një top që kaloi ngushtë jashtë portës në minutën e 13-të të sfidës së Manchester United në “Old Trafford” kundër Evertonit.

Pas gjuajtjes së Fernandes, Gueye dukej se po qortonte ashpër mbrojtësin Keane.

Të dy u vunë ballë për ballë, para se Gueye t’i jepte një shuplakë shokut të tij të skuadrës.

Gjyqtari Tony Harrington menjëherë nxori kartonin e kuq, duke përjashtuar 36-vjeçarin.

Në atë moment, Gueye u duk se u zemërua edhe më shumë, duke pasur nevojë të mbahej nga portieri Jordan Pickford.

Duke komentuar për “Sky Sports”, Gary Neville nuk u pajtua me kartonin e kuq.

Ish-mbrojtësi i Man Utd, 50 vjeç, e quajti kontaktin “të papërfillshëm” – duke shtuar se ndjente se një e verdhë do të kishte qenë e mjaftueshme.

Everton kishte humbur tashmë kapitenin Seamus Coleman për shkak të një dëmtimi të hershëm.

Mbrojtësi veteran, 37 vjeç, u detyrua të zëvendësohej nga Jake O’Brien vetëm 10 minuta pas fillimit të ndeshjes.

Evertoni megjithatë po fiton me një lojtar më pak, me Kiernan Dewsbury-Hall që shënoi në minutën e 29-të për 1-0.